Ang Mabuting Balita ng Panginoon ayon kay San Lucas
Ikalabinlimang taon noon ng paghahari ni Emperador Tiberio. Si Poncio Pilato ang gobernador sa Judea, si Herodes ang tetrarka sa Galilea at ang kapatid naman niyang si Felipe, sa lupain ng Iturea at Traconite. Si Lisanias ang tetrarka sa Abilinia. Sina Anas at Caifas naman ang mga pinakapunong saserdote noon. Nang panahong iyon, nasa ilang si Juan na anak ni Zacarias. Dumating sa kanya ang salita ng Diyos, kaya’t nilibot niya ang mga lupain sa magkabilang panig ng Jordan at nangaral. “Pagsisihan ninyo’t talikdan ang inyong mga kasalanan at pabinyag kayo upang kayo’y patawarin ng Diyos,” wika niya. “Sa gayo’y natupad ang nasusulat sa aklat ni propeta Isaias”
“Ito ang sabi ng isang sumisigaw sa ilang:
‘ihanda ninyo ang daraanan ng Panginoon,
tuwirin ninyo ang kanyang mga landas!
Tatambakan ang bawat lambak,
at titibagin ang bawat burol at bundok.
Tutuwirin ang daang liku-liko,
at papatagin ang daang baku-bako.
At makikita ng lahat ng tao ang pagliligtas na gagawin ng Diyos.
Ang Mabuting Balita ng Panginoon.
Pagmamasid
Nasasabik ka na ba sa nalalapit na Araw ng Pasko? Ano ang mga paghahandang ginawa mo? Nakapamili ka na ba at naibalot ang mga regalo? Mayroon ka na bang isusuot para sa inyong mga Christmas party at mga reunion? Excited ka na ba sa mga masasarap na pagkain sa mga handaan? Ang mahalagang tanong: Ano nga ba ang dapat na paghahandang ginagawa natin para sa Pasko?
Paghahawi
Si San Juan ang huli sa mga propetang dumating bago ang pagsilang ng Mesiyas. Nilibot niya ang mga lupain upang mangaral ukol sa nalalapit na pagdating ng Panginoon.
“Ihanda ninyo ang daraanan ng Panginoon, tuwirin ninyo ang kanyang mga landas! Tatambakan ang bawat lambak, at titibagin ang bawat burol at bundok. Tutuwirin ang daang liku-liko, at papatagin ang daang baku-bako. At makikita ng lahat ng tao ang pagliligtas na gagawin ng Diyos.” Lucas 3:6
Pagtatabas
Masasabi ko bang handa akong tulad ni San Juan Bautista sa pagtupad sa kalooban ng Diyos?
Pagsasaayos
Ilang araw na lang ay sasapit na ang Pasko. Marahil excited at handa na tayo sa mga masasayang gawain, mga regalo, mga pagkain, damit at laruan! Ngunit kung ang ipinagdiriwang natin ay ang birthday ni Hesus, ano nga ba ang pinakamagandang paghahanda at regalo natin sa kanya?
Bilang mga Kristiyano hinahamon tayo ni San Juan Bautista na magbago at linisin ang ating kalooban. Hindi lang mga panlabas na paghahanda ang dapat nating pagkaabalahan. Bagkus, hinihimok niya tayo ng ganito – “Pagsisihan ninyo’t talikdan ang inyong mga kasalanan at pabinyag kayo upang kayo’y patawarin ng Diyos.”
Tayo ba ay nakapagsisimba at nakapagkumpisal? Nakatulong ba tayo sa mga higit na nangangailangan? Anong paghahandog ng ating yaman, oras at kakayanan ang naibahagi natin sa kapwa?
Marahil, bukod sa mga bagong damit at regalo, mas mahalagang pagtuunan natin ng pansin ang mga gawaing maka pagpapayaman ng ating Espiritu upang tayo’y maging tunay na handa sa Pasko.
Pagdiriwang
Paano ko maihahanda ang daan para sa Panginoon at linisin para sa Kanya ng isang matuwid na landas sa aking buhay?
🍎 Huwag kalimutang i-download at sagutan ang LiturgyFun worksheet para sa linggong ito!
🙏 Manalangin tayo…
+ Panginoong Diyos, tibayan Mo ang aming kalooban sa paghahawan ng matuwid na daan para sa Iyong Anak na si Hesus. Punuin Mo ang mga lambak ng aming mga kabiguan, patagin ang mga bundok ng aming pagmamataas, at iayos ang aming baku-bakong daan ng masamang pag-uugali. Isinasamo namin ito sa ngalan ni Hesus na aming Panginoon. Amen!
