🗓️ Araw ng Kapistahan: Aug 27
🛡️ Patron ng mga ina, mga may problema sa asawa, mga lulong sa alak at pagbabagong loob
Ipinanganak si Santa Monica sa Tagaste, North Africa noong taong 331.
Kaugalian noong mga panahong yon na piliin ng magulang ang mapapangasawa ng kanilang mga anak. Ang asawa ni Sta. Monica na si Patricius ay hindi naging mabuting asawa. Siya ay marahas na tao at kalimitang nilulustay ang kanilang pera.
Sa kabila nito ay mahal na mahal ni Santa Monica ang kanyang asawa. Araw araw ay mataimtim siyang nananalangin upang baguhin ng Panginoon ang kanyang asawa. Noong una ay hindi naniniwala ang kanyang asawa ngunit kalaunan ay nagkaroon ng pagbabago sa kanyang puso at siya’y nagpabinyag.
Isa sa mga anak ni Santa Monica at Patricius ay si St. Augustine. Noong siya ay bata pa, ay nabubuhay siya sa kasalanan. Gabi gabi ay umiiyak siya’t nananalangin na magbalik-loob sa tamang landas ang kanyang anak. Sa wakas ay dininig ang kanyang panalangin makalipas ang labimpitong (17) taon! Nagbagong loob si St. Augustine at naging isa sa mga pinaka-prominenteng relihiyoso magpasahanggang ngayon.
🙏Manalangin tayo…
+ O Mapitagang Santa Monica, pinagsumikapang mong baguhin ang nawawalay mong anak, hindi ng pananakot kundi ng pananalanging puno ng luha. Mamagitan ka para sa lahat ng mga ina ng aming panahon upang maakay nila ang kanilang mga anak sa Diyos. Turuan mo po sila kung paanong manatiling malapit sa kanilang mga anak, maging ang mga anak na nawalay na ng landas.
Bigyan mo kami ng iyong katatagan, pasensya, at pagtitiwala sa Panginoon. Mamagitan ka para sa amin, minamahal naming Santa Monica upang pakinggan ng Diyos ang aming mga panalangin para kay/sa [banggitin ang hiling dito] , at ipagkaloob sa amin na tanggapin ang Kanyang kalooban sa lahat ng bagay, sa pamamagitan ni Hesukristong Panginoon namin, kaisa ng Espiritu Santo, isang Diyos magpasawalang hanggan. Amen.
Santa Monica, Ipanalangin mo kami!
