Ang wakas ng Mabuting Balita ng Panginoon ayon kay San Mateo
Noong panahong iyon, ang Labing-isang alagad ay nagpunta sa Galilea, sa bundok na itinuro sa kanila ni Hesus. Nang makita nila si Hesus, siya’y sinamba nila, bagamat may ilang nag-alinlangan. Lumapit si Hesus at sinabi sa kanila, “Ibinigay na sa akin ang lahat ng kapangyarihan sa langit at sa Lupa. Kaya, humayo kayo at gawin ninyong alagad ko ang lahat ng bansa. Binyagan ninyo sila sa ngalan ng Ama at ng Anak at ng Espiritu Santo, at turuang sumunod sa lahat ng ipinag-utos ko sa inyo. Tandaan ninyo: ako’y laging kasama ninyo hanggang sa katapusan ng sanlibutan.”
Ang Mabuting Balita ng Panginoon.
📖 Kuwento ni Hesus
Nagpunta ang labing-isang alagad sa bundok sa Galilea gaya ng utos ni Kuya Hesus bago Siya umakyat sa langit. Lumapit si Kuya Hesus at ibinigay sa kanila ang mahalagang misyon na gawing alagad ang lahat ng bansa at binyagan sila sa ngalan ng Banal na Santatlo. Itinuro rin Niya na dapat nilang turuan ang lahat na sumunod sa Kanyang mga utos habang naglalakbay sa mundo. Sa dulo, tiniyak ni Kuya Hesus na hinding-hindi Niya tayo iiwan at sasamahan tayo sa bawat sandali hanggang sa katapusan ng sanlibutan.
“Kaya, humayo kayo at gawin ninyong alagad ko ang lahat ng bansa. Tandaan ninyo: ako’y laging kasama ninyo hanggang sa katapusan ng sanlibutan.” Mateo 28:19–20
🙇🏽♂️ Ating Karanasan
Ano ang nararamdaman mo kapag umaalis si Nanay o si Tatay para magtrabaho at naiiwan kang mag-isa sa bahay? Siguro ay medyo natatakot ka dahil wala ang iyong mga tagapag-alaga at naiisip mo kung ano ang gagawin mo kapag may dumating na hindi mo kakilala. Sa ngayon, madali na silang tawagan sa cellphone o i-video call para mabawasan ang iyong kaba, pero noong unang panahon ay wala pang ganitong teknolohiya. Ganito ang naramdaman ng mga apostol nang magpaalam si Hesus na Siya ay aakyat na sa langit. Bagama’t hindi na nila Siya makikitang pisikal, iniwan Niya ang isang pangako na magbibigay sa kanila ng lakas ng loob na harapin ang anumang pagsubok sa buhay.
🔍 Balikan ang Sarili
Ano ang maaari kong gawin upang makibahagi sa misyong inihabilin Niya sa ating lahat?
🌟 Aral ni Hesus
Sa Pag-akyat ni Hesus sa Langit, hindi natapos ang Kanyang gawain. Sa halip, ibinigay Niya ito sa atin na Kanyang mga tagasunod.
🟡 Si Hesus ay Hari na may kapangyarihan at pagmamahal. Ibinigay sa Kanya ang lahat ng kapangyarihan sa langit at sa lupa. Kapag nagtitiwala tayo sa Kanya, alam nating Siya ang gumagabay at nagpoprotekta sa atin araw-araw.
🟡 Tayo ay tinatawag na maging Kanyang mga saksi. Inutusan tayo ni Hesus na ibahagi ang Kanyang aral sa lahat. Bilang bata, magagawa mo ito sa pagiging mabait, tapat, at mapagmahal sa bahay at sa paaralan.
🟡 Hindi tayo nag-iisa dahil kasama natin si Hesus magpakailanman. Kahit hindi na natin Siya nakikita, totoo ang Kanyang pangako na Siya ay laging nasa ating piling. Sa panalangin at mabuting gawa, nararamdaman natin ang Kanyang presensya.
👦🏽👧🏽 Munting Gawain
✅ Bilang sugo ni Hesus, ang iyong misyon ay magbigay ng ngiti at positibong enerhiya sa lahat ng iyong makakasalamuha sa labas ng bahay.
✅ Anyayahan at isama ang isang kaibigan na bumisita sa simbahan o magdasal kasama mo.
✅ Gumawa ng maliit na “mission” card: “Ako ay sugo ni Hesus!” at ilagay dito ang mga maliit na hakbang na gagawin mo bilang sugo Niya.
🍎 Palalimin natin ang ating pagkakaunawa sa Ebanghelyo ngayong linggo kasama si Sr. Emelita Alvarez, SPC ng Sisters of St. Paul of Chartres. 😇
Maraming salamat sa mga ka-partner natin sa Pontifical Mission Societies Philippines ♥️
🍎 Huwag kalimutang i-download at sagutan ang LiturgyFun worksheet para sa linggong ito!
🙏 Panalangin
♱ Panginoong Hesus, salamat po sa Iyong pangako na hinding-hindi Mo kami iiwan kahit Ikaw ay nasa langit na. Tulungan Mo po kaming maging matapang na mga alagad Mo na laging nagkakalat ng Iyong pag-ibig at mabuting balita sa lahat ng tao sa aming paligid. Amen.
