Ang Mabuting Balita ng Panginoon ayon kay San Mateo
Noong panahong iyon: Dumating si Hesus sa isang bayan sa Samaria, na tinatawag na Sicar, malapit sa bukid na ibinigay ni Jacob sa kanyang anak na si Jose. Dito matatagpuan ang balon ni Jacob. Umupo si Hesus sa tabi nito, sapagkat siya’y napagod sa paglalakbay. Halos katanghaliang-tapat na noon.
May isang Samaritanang dumating upang umigib. Sinabi ni Hesus sa kanya, “Maaari bang makiinom?” Wala noon ang kanyang mga alagad sapagkat bumili ng pagkain sa bayan. Sinabi sa kanya ng Samaritana, “Kayo’y Judio at Samaritana ako! Bakit kayo humihingi sa akin ng inumin?” Sapagkat, hindi nakikitungo ang mga Judio sa mga Samaritano. Sumagot si Hesus, “Kung alam lamang ninyo kung ano ang ipinagkakaloob ng Diyos, at kung sino itong humihingi sa inyo ng inumin, marahil ay kayo ang hihingi sa kanya, at kayo nama’y bibigyan niya ng tubig na nagbibigay-buhay?” “Ginoo,” wika ng babae, “malalim ang balong ito at wala man lamang kayong panalok. Saan kayo kukuha ng tubig na nagbibigay-buhay? Higit pa ba kayo kaysa aming ninunong si Jacob, na nagbigay sa amin ng balong ito? Uminom siya rito, pati ang kanyang mga anak, at ang kanyang mga hayop.” Sumagot si Hesus, “Ang uminom ng tubig na ito’y muling mauuhaw, ngunit ang uminom ng tubig na ibibigay ko ay hindi na muling mauuhaw. Ito’y magiging isang bukal sa loob niya, babalong, at magbibigay sa kanya ng buhay na walang hanggan.” Sinabi ng babae, “Ginoo, kung gayun po’y bigyan ninyo ako ng tubig na sinasabi ninyo, nang hindi na ako mauhaw, ni pumarito pa upang sumalok.” Umuwi ka at isama mo rito ang iyong asawa,” wika ni Hesus. “Wala po akong asawa,” anang babae. “Tama ang sinabi mong wala kang asawa,” tugon ni Hesus. “Sapagkat lima na ang iyong naging asawa, at ang kinakasama mo ngayon ay hindi mo asawa. Totoo ang sinabi mo.” Sinabi ng babae, “ Tinugon siya ni Hesus, “Maniwala ka sa akin, Ginang, dumarating na ang panahon na sasambahin ninyo ang Ama, hindi lamang sa bundok na ito o sa Jerusalem. Hindi ninyo nakikilala ang inyong sinasamba, ngunit nakikilala namin ang aming sinasamba, sapagkat ang kaligtasan ay galing sa mga Judio. Ngunit dumarating na ang panahon – ngayon na nga – na ang mga tunay na sumasamba sa Ama ay sasamba sa kanya sa espiritu at sa katotohanan. Sapagkat ito ang hinahanap ng Ama sa mga sumasamba sa kanya. Ang Diyos ay Espiritu kaya dapat siyang sambahin sa espiritu at sa katotohanan.”
Sinabi ng babae, “Nalalaman ko pong paririto ang Mesiyas, ang tinatawag na Kristo. Pagparito niya, siya ang magpapahayag sa atin ng lahat ng bagay.” “Akong nagsasalita sa iyo ang tinutukoy mo,” sabi ni Hesus.
Dumating nang sandaling iyon ang kanyang mga alagad. Nabigla sila nang makitang nakikipag-usap siya sa isang babae. Ngunit isa man sa kanila’y walang nagtanong kung ano ang ibig ni Hesus o kaya’y kung bakit siya nakikipag-usap sa babae.
Iniwan ng babae ang kanyang banga, bumalik sa bayan at sinabi sa mga tagaroon, “Halikayo! Tingnan ninyo ang taong nagsabi sa akin ng lahat ng ginawa ko. Siya na kaya ang Kristo?” Kaya’t lumabas sila ng bayan at nagpunta kay Hesus.
Samantala, makailang ulit na sinabi sa kanya ng mga alagad, “Rabi, kumain na po kayo.” Ngunit sumagot siya, “Ako’y may pagkaing hindi ninyo alam.” Kaya’t nag-usap-usap ang mga alagad, “May nagdala kaya sa kanya ng pagkain?” Sinabi sa kanila ni Hesus, “Ang pagkain ko’y ang tuparin ang kalooban ng nagsugo sa akin, at ganapin ang ipinagagawa niya.”
“Hindi ba sinasabi ninyo, ‘Apat na buwan pa at anihan na’? Sinasabi ko sa inyo, masdan ninyo ang mga bukid: hinog na at handa nang anihin. Ang gumagapas ay tumatanggap ng upa at nagtitipon ng bunga para sa buhay na walang hanggan. Kaya’t magkasamang nagagalak ang naghahasik at ang nag-aani. Kaya totoo ang kasabihang, ‘Iba ang naghahasik at iba naman ang nag-aani.’ Sinugo ko kayo upang anihin ang hindi ninyo inihasik. Nagpagal ang iba, at kayo ang nag-aani sa kanilang pinagpagalan.”
Maraming Samaritano sa bayang yaon ang sumampalataya kay Hesus dahil sa patotoong ito ng babae, “Sinabi niya sa akin ang lahat ng aking ginawa.” Kaya’t paglapit ng mga Samaritano kay Hesus, hiniling nila na tumigil muna siya roon; at nanatili siya roon nang dalawang araw.
At marami pang sumampalataya nang mapakinggan siya. Sinabi nila sa babae, “Nananampalataya kami ngayon, hindi na dahil sa sinabi mo kundi dahil sa narinig namin sa kanya. Nakilala naming siya nga ang Tagapagligtas ng sanlibutan.”
Ang Mabuting Balita ng Panginoon.
📖 Kuwento ni Hesus
Nakipag-usap si Hesus sa isang babaeng Samaritana sa tabi ng balon at inalok siya ng “tubig na nagbibigay-buhay” na hinding-hindi magdudulot ng uhaw. Ipinakita ni Hesus na kilala Niya ang buong buhay ng babae, kaya naman naniwala ito na Siya ang Mesiyas at agad itong ibinalita sa kanyang mga kanayon. Dahil sa pag-uusap na ito, maraming Samaritano ang naniwala at kumilala kay Hesus bilang Tagapagligtas ng sanlibutan.
“Ang uminom ng tubig na ito’y muling mauuhaw, ngunit ang uminom ng tubig na ibibigay ko ay hindi na muling mauuhaw. Ito’y magiging isang bukal sa loob niya, babalong, at magbibigay sa kanya ng buhay na walang hanggan.” Juan 4:13-14
🙇🏽♂️ Ating Karanasan
Kailan ka huling naglaro nang habulan o basketball hanggang humingal nang humingal at naligo na sa iyong pawis? Pagkatapos nito, tiyak na uhaw na uhaw ka at ang sarap uminom ng isang pitsel ng tubig na puno ng yelo. Pero napansin mo ba na maya-maya lang ay tila nauuhaw ka na naman at kailangan mong uminom muli? Kung may makakasalubong ka na mag-aalok ng tubig na hinding-hindi ka na mauuhaw kailanman, iinumin mo ba ito? Ganito ang alok ni Hesus sa babaeng Samaritana at sa ating lahat. Ang tubig ay sagisag ng buhay, at ang mga aral ni Hesus ang nagsisilbing inumin ng ating kaluluwa upang hindi tayo manghina.
🔍 Balikan ang Sarili
Kinikilala mo ba na si Hesus ang bukal ng grasya sa iyong kaluluwa, at anong aral Niya ang pinaka nakakatulong sa iyo sa araw-araw?
🌟 Aral ni Hesus
Si Hesus ang nagbibigay ng tunay na sigla at pagmamahal na kailangan ng ating puso upang hindi tayo maging tuyot sa kabutihan. Kapag tinanggap natin Siya, ang Kanyang grasya ay magiging parang bukal na laging nagbibigay sa atin ng lakas at pag-asa.
✝️ Hanapin si Kristo sa pamamagitan ng tapat na pagdarasal at pakikinig sa Misa. Ang pakikipag-usap sa Diyos ay parang pag-inom ng tubig na nagbibigay-sigla sa ating kalooban lalo na kapag tayo ay malungkot o pagod sa ating mga gawain.
✝️ Pawiin ang uhaw ng kaluluwa sa pagbabasa ng Banal na Kasulatan. Ang mga Salita ng Diyos ay nagbibigay ng tamang direksyon at aral na nagpapatalas sa ating isipan upang laging piliin ang pagmamahal at pagpapatawad sa kapwa.
✝️ Maging daluyan ng “tubig ng buhay” sa pamamagitan ng paglilingkod sa iba. Gaya ng babaeng Samaritana na nagbalita tungkol kay Hesus, maaari mo ring ibahagi ang saya ng pananampalataya sa iyong mga kalaro at pamilya sa pamamagitan ng iyong mabuting asal.
👦🏽👧🏽 Munting Gawain
✅ Magbasa ng isang kabanata sa Bibliya bawat linggo at isulat sa notebook ang isang salitang tumatak sa iyong puso.
✅ Magbigay ng tubig o simpleng meriyenda sa mga taong nagtatrabaho sa ilalim ng init ng araw, gaya ng mga guard o basurero, bilang tanda ng malasakit.
✅ Isama sa iyong dasal bago matulog ang mga taong nakalimutan nang tumawag sa Diyos upang sila rin ay makatagpo ng Kanyang grasya.
🍎 Huwag kalimutang i-download at sagutan ang LiturgyFun worksheet para sa linggong ito!
🙏 Panalangin
♱ Panginoong Hesus, Ikaw ang bukal ng buhay na nagpapawi ng lahat ng aming pagkauhaw. Basbasan Mo po ang aming puso ng Iyong grasya upang lagi kaming maging masigla sa paggawa ng mabuti at pagmamahal sa aming kapwa. Amen.
