Ang Mabuting Balita ng Panginoon ayon kay San Lucas
Noong panahong iyon, nagsalita si Hesus sa mga tao tungkol sa paghahari ng Diyos; pinagaling niya ang mga may karamdaman.
Nang dumidilim na’y nilapitan siya ng Labindalawa at sinabi sa kanya, “Paalisin na po ninyo ang mga tao nang makaparoon sila sa mga nayon sa kabukiran sa paligid upang humanap ng makakain at matutuluyan. Nasa isang ilang na lugar po tayo.” Ngunit sinabi niya, “Kayo ang magbibigay sa kanila ng makakain.” Sumagot sila, “Wala po tayo kundi limang tinapay at dalawang isda, kaya kailangang bumili kami ng pagkain para sa mga taong ito. May limanlibong lalaki ang naroon. Ngunit sinabi niya sa kanyang mga alagad, “Paupuin ninyo sila nang pulu-pulutong na tiglilimampu.” Gayun nga ang ginawa nila – pinaupo ang lahat. Kinuha ni Hesus ang limang tinapay at dalawang isda, tumingala sa langit, at nagpasalamat sa Diyos. Pinaghati-hati niya ang mga ito, at ibinigay sa kanyang mga alagad upang ipamahagi sa mga tao. Nakakain ang lahat at nabusog. Tinipon ng mga alagad ang lumabis; at nakapuno sila ng labindalawang bakol.
Ang Mabuting Balita ng Panginoon.
🙇🏽♂️ Ating Karanasan
Naranasan mo na bang magbahagi ng baon sa kaklase na walang pagkain? Nakakatuwang makita ang ngiti sa mukha ng isang kaibigan na nabigyan mo kahit kaunti. Minsan, akala natin kulang ang meron tayo, pero kapag ibinahagi natin ito nang may pagmamahal, parang mas dumarami pa! Ang totoong pagbabahagi ay hindi nasusukat sa dami ng ibinigay kundi sa kabutihang loob. Tulad ng tinapay at isda sa Ebanghelyo, ang biyaya ay hindi nauubos kapag ibinabahagi.
📖 Kwento ni Hesus
Habang Siya’y nagtuturo at nagpapagaling, dumating ang gabi at nag-alala ang mga alagad kung saan kakain ang lahat. Ngunit sinabi ni Hesus, “Kayo ang magpakain sa kanila.” May limang tinapay at dalawang isda lamang sila, pero binasbasan ni Hesus ito at ipinamahagi. Lahat ay nakakain at nabusog. Sa katunayan, may labindalawang bakol pang natira!
“Pinaghati-hati niya ang mga ito, at ibinigay sa kanyang mga alagad upang ipamahagi sa mga tao. Nakakain ang lahat at nabusog.” Lucas 9:16–17
🔍 Balikan ang Sarili
Paano mo maibabahagi ang pagmamahal at kabutihang natatanggap mo mula kay Hesus sa iba?
🌟 Aral ni Hesus
Ang Eukaristiya ay tanda ng walang hanggang pagmamahal at pagbibigay ni Hesus para sa atin. Tuwing tayo ay nagmimisa, ginugunita natin ang pag-aalay Niya ng Kanyang sarili upang tayo ay mailigtas sa kasalanan. Ang tinapay na Kanyang hinati at ipinamigay ay larawan ng isang pusong laging handang magbahagi at magmahal.
🥖 Ang biyaya ay dapat ibahagi. Kahit konti lang ang meron tayo, puwede na itong maging pagpapala sa iba—parang baon na hinati para sa kaklase o laruan na hindi na natin nagagamit na ibinigay bilang donation. Kapag bukas ang ating puso sa pagbibigay, hindi lang bagay ang ibinahagi kundi ligaya… sa ating sarili at sa kapwa.
🥖Ang biyaya ay hindi nauubos. Sa bawat pagbabahagi, mas dumarami pa ang galak at grasya—gaya ng labindalawang bakol na sobrang pagkain sa Ebanghelyo. Kapag ang puso natin ay mapagbigay, natututo rin tayong magtiwala na si Hesus ang magpupuno sa mga kakulangan natin sa buhay.
🥖Tinatanggap natin ang pagpapala at lakas sa Eukaristiya. Sa Misa, ang hostiyang tinatanggap natin ay pisikal na anyo ng katawan ni Kristo at tanda ng kanyang sakripisyo. Tuwing tinatanggap natin Siya sa Banal na Komunyon, pinapalakas Niya ang ating puso para magmahal, magpatawad, at tumulong.
Tandaan natin: kapag nagmamahal at nagbibigay tayo gaya ni Hesus, walang masasayang—lahat ay mabubusog! Ang Eukaristiya ay paalala na ang pagmamahal ni Hesus ay dapat ipamahagi upang umabot sa iba.
👐 Gawa
Ngayong linggo, sundin natin ang halimbawa ni Hesus sa Eukaristiya.
✅ Magbahagi ng merienda sa isang kaklaseng walang baon.
✅ Manalangin para sa mga taong nagugutom sa mundo.
✅ Tumulong sa gawaing bahay bilang alay kay Hesus.
🍎 Huwag kalimutang i-download at sagutan ang LiturgyFun worksheet para sa linggong ito!
🙏 Manalangin tayo…
♱ Panginoong Hesus, salamat po sa Inyong presensya sa bawat bahagi ng aming buhay. Tulungan po Ninyo akong makilala Kayo sa biyaya, kabutihan, at pagmamahal na dumadaloy araw-araw. Amen.
