Ang Mabuting Balita ng Panginoon ayon kay San Mateo
Noong panahong iyon: si Hesus ay dinala ng Espiritu sa ilang upang tuksuhin ng diyablo. Doon, apatnapung araw at apatnapung gabi nag-ayuno si Hesus, at siya’y nagutom. Dumating ang manunukso at sinabi sa kaniya, “Kung ikaw ang Anak ng Diyos, gawin mong tinapay ang mga batong ito.” Ngunit sumagot si Hesus, “Nasusulat,
‘Hindi lamang sa tinapay nabubuhay ang tao,
kundi sa bawat salitang namumutawi sa bibig ng Diyos.”
Pagkatapos nito’y dinala siya ng diyablo sa taluktok ng templo sa Banal na Lungsod. “Kung ikaw ang Anak ng Diyos,” sabi sa kanya, “magpatihulog ka, sapagkat nasusulat,
‘Ipagbibilin niya sa kanyang mga anghel na ingatan ka,’
‘Aalalayan ka nila,
upang hindi ka matisod sa bato.’”
Sumagot si Hesus, “Nasusulat din naman, ‘Huwag mong subukin ang Panginoon mong Diyos.’”
Pagkatapos, dinala din siya ng diyablo sa isang napakataas na bundok. Mula roo’y ipinatanaw sa kanya ang lahat ng kaharian ng sanlibutan at ang kayamanan ng mga ito. At sinabi ng diyablo, “Ibibigay ko sa iyo ang lahat ng ito, kung magpapatirapa ka at sasamba sa akin.” Sumagot si Hesus, “Lumayas ka, Satanas! Sapagkat nasusulat,
‘Ang iyong Diyos at Panginoon ang sasambahin mo;
Siya lamang ang iyong paglilingkuran.’”
At iniwan siya ng diyablo. Dumating ang mga anghel at naglingkod sa kanya.
Ang Mabuting Balita ng Panginoon.
📖 Kuwento ni Hesus
Pagkatapos mag-ayuno ng apatnapung araw sa ilang, si Hesus ay nakaramdam ng matinding gutom at dito Siya tinangkang tuksuhin ng diyablo. Ginamit ng demonyo ang gutom, kapangyarihan, at kayamanan upang subukin ang katapatan ni Hesus sa Ama. Sa bawat panunukso, sumagot si Hesus gamit ang mga Salita ng Diyos sa Bibliya hanggang sa lumayas ang diyablo. Pinatunayan ni Hesus na ang pananampalataya at pagtitiwala sa Diyos ang pinakamalakas na sandata laban sa kasamaan.
“Nasusulat, ‘Hindi lamang sa tinapay nabubuhay ang tao, kundi sa bawat salitang namumutawi sa bibig ng Diyos.” Mateo 4:4
🙇🏽♂️ Ating Karanasan
Ngayon ang unang linggo ng Kuwaresma, ang apatnapung araw na paghahanda natin para sa muling pagkabuhay ni Hesus. Tulad ni Hesus na nagutom sa ilang, madalas din tayong dumaranas ng mga “pagkakait” o kagustuhan sa buhay. Halimbawa, kung ikaw ay walang pera at gutom na gutom, nakatayo sa tapat ng tindahan na walang bantay, kukuha ka ba ng tinapay nang hindi nagbabayad? O kaya naman ay may nakita kang pera sa lamesa, iisipin mo bang “biyaya” ito kahit hindi naman sa iyo para lang makabili ng regalo? Minsan akala natin ay ayos lang gumawa ng mali lalo na kung walang nakakakita, pero si Hesus ay nagpakita ng ibang halimbawa. Nilabanan Niya ang tukso sa pamamagitan ng pagkapit sa Salita ng Diyos.
🔍 Balikan ang Sarili
Ano ang ginagawa mo kapag ikaw ay tinutukso na gumawa ng masama, at saan ka humuhugot ng lakas para labanan ito?
🌟 Aral ni Hesus
Ibinigay na ni Hesus ang lahat ng kailangan natin upang maging matatag at hindi matalo ng mga maling gawain. Sa pamamagitan ng pagbabasa ng Mabuting Balita, nagkakaroon tayo ng liwanag upang piliin ang tama sa gitna ng paghihirap.
✝️Gawing gabay ang Salita ng Diyos sa pagpili ng tama sa araw-araw. Kapag tinutukso kang magsinungaling sa iyong mga magulang, alalahanin ang turo ni Hesus tungkol sa katotohanan upang manatiling malinis ang iyong puso.
✝️Magtiwala sa plano at pagmamahal ng Diyos at hindi sa mga madaliang solusyon. Imbes na kumuha ng bagay na hindi sa iyo dahil kailangan mo ito, mas mabuting humingi ng tulong at magdasal dahil laging may tamang paraan ang Diyos para magbigay ng ating pangangailangan.
✝️Maging matatag sa pananampalataya sa pamamagitan ng madalas na pagdarasal. Kapag nakakaramdam ka ng kahinaan ng loob, kausapin mo ang Panginoon at basahin ang Bibliya upang mapuno ka ng pag-asa at lakas na labanan ang anumang masamang udyok.
👦🏽👧🏽 Munting Gawain
✅ Magbasa ng isang kuwento sa Bibliya bago matulog upang maging pamilyar sa mga Salita ng Diyos na panlaban sa tukso.
✅ Sa halip na magalit o gumanti kapag inasar ng kalaro, ipagdasal sila at piliing maging mahinahon bilang sakripisyo.
✅ Mag-ipon ng barya mula sa sariling baon upang ibigay sa simbahan o sa mga nangangailangan.
🍎 Huwag kalimutang i-download at sagutan ang LiturgyFun worksheet para sa linggong ito!
🙏 Panalangin
♱ Panginoong Hesus, salamat sa pagpapakita Mo na ang Iyong Salita ang aming lakas laban sa lahat ng tukso. Tulungan Mo po kaming maging matatag at laging piliin ang kabutihan kahit na nahihirapan kami, upang lalo kaming mapalapit sa Iyo ngayong Kuwaresma. Amen.
