Ang Mabuting Balita ng Panginoon ayon kay San Mateo
Pagkaalis ng mga Pantas, napakita kay Jose sa panaginip ang isang anghel ng Panginoon. Sinabi sa kanya, “Magbangon ka, dalhin mo agad sa Egipto ang mag-ina. At huwag kayong aalis doon hangga’t hindi ko sinasabi sa iyo, sapagkat hahanapin ni Herodes ang sanggol upang patayin.” Kaya dali-daling bumangon si Jose at nang gabing iyo’y dinala sa Egipto ang mag-ina. Doon sila tumira hanggang sa mamatay si Herodes.
Nangyari ito upang matupad ang sinabi ng Panginoon sa pamamagitan ng propeta, “Tinawag ko ang aking Anak mula sa Egipto.”
Pagkamatay ni Herodes, isang anghel ng Panginoon ang napakita sa panaginip kay Jose sa Egipto. “Magbangon ka,” sabi sa kanya, “iuwi mo na sa Israel ang mag-ina, sapagkat patay na ang nagtangka sa buhay ng bata.” Nagbangon siya at iniuwi nga sa Israel ang mag-ina.
Ngunit nang mabalitaan niyang si Arquelao ang naghahari sa Judea, kahalili ng kanyang amang si Herodes, siya’y natakot na pumunta roon. Muli siyang sinabihan sa panaginip, kaya’t nagtungo siya sa Galilea. Sa Nazaret sila nanirahan upang matupad ang sinabi ng mga propeta, “Siya’y tatawaging Nazareno.”
Ang Mabuting Balita ng Panginoon.
📖 Kwento ni Hesus
Matapos umalis ang mga Pantas, nagpakita ang isang anghel kay Jose sa panaginip at inutusan siyang iligtas ang mag-ina sa pamamagitan ng pagpunta sa Egipto. Agad na sumunod si Jose at dinala si Maria at ang sanggol na si Hesus sa ligtas na lugar. Pagkaraan ng ilang panahon, muli siyang inutusan ng Diyos na bumalik at manirahan sa Nazaret. Sa lahat ng ito, ipinakita ng Banal na Mag-anak ang tiwala at pagsunod sa kalooban ng Diyos.
“Kaya dali-daling bumangon si Jose at nang gabing iyo’y dinala sa Egipto ang mag-ina. Doon sila tumira hanggang sa mamatay si Herodes.” Mateo 2:14–15
🙇🏽♂️ Ating Karanasan
Bawat pamilya ay may kanya-kanyang kwento. May mga kasama ang ama at ina, at mayroon ding lolo, lola, o single parent ang nag-aalaga. Anuman ang ayos ng ating tahanan, bawat isa sa atin ay may mahalagang tungkulin para sa ikasaya at ikatitiwasay ng pagsasama ng lahat. Ngunit may mga pagkakataon na mahirap sumunod, lalo na kung tayo ay may problema. Pero tulad ng Banal na Mag-anak, tinatawag din tayo ng Diyos na makinig at magtiwala. Kapag nakikinig tayo sa Kanya, ginagabayan Niya tayo patungo sa tamang landas.
🔍 Balikan ang Sarili
Pinahihintulutan ko bang gabayan ng Diyos ang aking pamilya at ang aking mga desisyon araw-araw?
🌟 Aral ni Hesus
Ipinapakita ng Banal na Mag-anak na ang masayang pamilya ay marunong makinig at magtiwala sa Diyos. Kapag ginagawa natin ang tama kahit mahirap, mas nagiging matibay ang ating pamilya.
👪 Nakikinig si Jose sa Diyos at agad siyang kumikilos. Kahit natatakot siya, ginawa niya ang sinabi ng Diyos para iligtas ang kanyang pamilya. Kapag pinipili mong sumunod sa magulang kahit gusto mo munang maglaro, ginagaya mo ang kabutihang ginawa ni Jose.
👪 May mahalagang papel ang bawat isa sa pamilya. Si Jose ay nag-alaga at nagprotekta, si Maria ay nagmahal at nag-aruga. Kapag tumutulong ka sa bahay o nag-aalaga ng kapatid, nakakatulong ka sa pagiging masaya ng inyong pamilya.
👪 Palalakasin ng Panginoon ang ating loob kung tayo ay susunod sa Kanya. Hindi alam ni Jose ang mangyayari, pero nagtiwala siya sa Diyos. Kapag may problema ka sa paaralan o sa bahay, maaari kang magdasal at humingi ng tulong sa Diyos para lumakas ang iyong loob.
👦🏽👧🏽 Munting Gawain
✅ Makinig at sumunod kaagad kapag may ipinapagawa ang magulang o guro.
✅ Tumulong sa bahay ng may galak, kahit sa maliliit at simpleng mga gawain.
✅ Magdasal kasama ang pamilya bilang pasasalamat sa bawat araw.
🍎 Huwag kalimutang i-download at sagutan ang LiturgyFun worksheet para sa linggong ito!
🙏 Panalangin
♱ O Panginoon, salamat po sa halimbawa ng Banal na Mag-anak na nagturo sa amin ng pakikinig at pagtitiwala sa Iyo. Tulungan Mo po kaming mahalin ang aming pamilya at sundin ang Iyong kalooban araw-araw nang may tapang at galak. Amen.
