Ang Mabuting Balita ng Panginoon ayon kay San Mateo
Noong panahong iyon, nabalitaan ni Hesus na ibinilanggo si Juan, kaya’t bumalik siya sa Galilea. Ngunit hindi na siya sa Nazaret nanirahan kundi sa Capernaum. Ang bayang ito ay nasa baybayin ng Lawa ng Galilea, sa mga hangganan ng Zabulon at Neftali. Sa gayo’y natupad ang sinabi ni Propeta Isaias:
“Ang lupain ng Zabulon at lupain ng Neftali
daanan sa gawing dagat sa ibayo ng Jordan,
Galilea ng mga Hentil!
Itong bayang nag-apuhap sa gitna ng kadiliman
sa wakas ay nakakita ng maningning niyang ilaw!
Liwanag na taglay nito’y siya ngayong tumatanglaw
sa lahat ng nalugami sa lilim ng kamatayan!”
Magmula noon ay nangaral na si Hesus. Ang sabi niya, “Pagsisihan ninyo’t talikdan ang inyong mga kasalanan, sapagkat malapit nang maghari ang Diyos.”
Sa paglalakad ni Hesus sa tabi ng Lawa ng Galilea, nakita niya ang dalawang mangingisda, si Simon na tinatawag na Pedro, at ang kapatid niyang si Andres. Sila’y naghahagis ng lambat. Sinabi niya sa kanila, “Sumunod kayo sa akin, at gagawin ko kayong mamamalakaya ng mga tao.” Noon di’y iniwan nila ang kanilang mga lambat at sumunod kay Hesus.
Nagpatuloy siya sa paglakad at nakita rin niya ang magkapatid na Santiago at Juan, mga anak ni Zebedeo. Sila’y nasa bangka, kasama ng kanilang ama, at naghahayuma ng lambat. Tinawag din sila ni Hesus. Agad nilang iniwan ang bangka at ang kanilang ama, at sumunod kay Hesus.
Nilibot ni Hesus ang buong Galilea. Nagtuturo sa mga sinagoga at ipinangangaral ang Mabuting Balita tungkol sa paghahari ng Diyos. Pinagaling din niya ang mga tao sa kanilang mga sakit at karamdaman.
Ang Mabuting Balita ng Panginoon.
📖 Kwento ni Hesus
Nagsimulang mangaral si Hesus sa Galilea upang magsilbing liwanag sa mga taong nasa kadiliman. Habang naglalakad sa tabi ng lawa, tinawag niya ang mga mangingisdang sina Pedro, Andres, Santiago, at Juan upang sumunod sa kanya. Agad nilang iniwan ang kanilang mga lambat at pamilya upang maging “mamamalakaya ng mga tao” kasama ni Hesus. Nilibot nila ang mga bayan upang magturo, magpahayag ng Mabuting Balita, at magpagaling ng mga maysakit.
“Sumunod kayo sa akin, at gagawin ko kayong mamamalakaya ng mga tao.” Mateo 4:19
🙇🏽♂️ Ating Karanasan
Sino ang mag-aanyaya sa iyo na susundan mo kaagad? Kung sabihin ba sa iyo ng nanay o tatay mo na “Tara, alis tayo, punta tayo sa mall!”, sasama ka ba agad? Paano kung kaibigan mo naman ang mag-ayang umalis upang mamasyal, magiging excited ka ba? Siguradong masaya at handa tayong sumunod kapag mahal natin ang nag-aaya sa atin.
🔍 Balikan ang Sarili
Sa gitna ng aking pagiging abala sa pag-aaral o kahit sa masayang paglalaro, handa ko bang iwan ang lahat upang sumunod kay Hesus?
🌟 Aral ni Hesus
Nais ni Hesus na maging katuwang tayo sa pagpapalaganap ng pagmamahal ng Diyos sa lahat ng tao. Dahil malawak ang mundo, kailangan niya ng mga batang tulad mo na magsisilbing mga kamay at paa niya sa paggawa ng kabutihan.
❤️🔥 Maging handa at mabilis sa pagtugon sa tawag ng kabutihan. Tulad ng mga apostoles na agad iniwan ang kanilang mga lambat, sikapin nating sumunod agad sa tama at mabuti. Halimbawa, kapag tinawag ka ni Nanay para tumulong sa gawaing bahay, gawin ito nang may ngiti at huwag nang magpatumpik-tumpik pa sa pagsunod!
❤️🔥 Gamitin ang ating mga talento para ilapit ang kapwa sa Diyos. Tinawag ang mga unang apostoles ni Hesus na “mamamalakaya ng mga tao” dahil ang galing nila sa pangingisda. Ang kakayahan o talentong ito ang gagamitin sa pagtitipon ng mga tao para sa langit. Maaari mong gamitin ang iyong galing sa pagkanta, pagguhit, o kahit ang pagiging masayahin para magbigay ng pag-asa at inspirasyon sa mga nakapaligid sa iyo.
❤️🔥 Maging liwanag sa kapwa sa pamamagitan ng simpleng pagmamalasakit. Ang misyon ni Hesus ay maghatid ng liwanag sa mga nalulungkot, kaya huwag natin ipikit ang ating mga mata sa pangangailangan ng iba. Sa halip na maging “busy” sa gadgets o panonood ng tv, maglaan ng oras na kausapin ang isang kaklaseng malungkot o tulungan ang kapatid na nahihirapan sa assignment.
👦🏽👧🏽 Munting Gawain
✅ Sumunod agad sa utos ng mga magulang nang hindi nagdadahilan o nagdadabog.
✅ Ibahagi ang pagmamahal ni Hesus sa isang kaibigan sa pamamagitan ng pagpapakita ng kabutihan.
✅ Tumulong sa isang tao sa paaralan o komunidad na nangangailangan ng gabay o suporta.
🍎 Huwag kalimutang i-download at sagutan ang LiturgyFun worksheet para sa linggong ito!
🙏 Panalangin
♱ Panginoong Hesus, salamat po sa pagtawag sa akin na maging kaibigan at katuwang Mo sa misyon. Tulungan Mo po akong maging mabilis sa pagsunod sa Iyong utos na magmahal at maging liwanag sa aking kapwa. Amen.
