Ang Mabuting Balita ng Panginoon ayon kay San Juan
Noong panahong iyon: Sinabi ni Hesus sa kanyang mga alagad: “Kung iniibig ninyo ako, tutuparin ninyo ang aking mga utos. Dadalangin ako sa Ama, at kayo’y bibigyan niya ng isa pang patnubay na magiging kasama ninyo magpakailanman. Ito’y ang Espiritu ng katotohanan, na hindi matanggap ng sanlibutan sapagkat hindi siya nakikita ni nakikilala ng sanlibutan. Ngunit nakikilala ninyo siya, sapagkat siya’y sumasainyo at nananahan sa inyo.
“Hindi ko kayo iiwang nangungulila; babalik ako sa inyo. Kaunting panahon na lamang at hindi na ako makikita ng sanlibutan. Ngunit ako’y makikita ninyo; sapagkat mabubuhay ako, at mabubuhay rin kayo. Malalaman ninyo sa araw na yaon na ako’y sumasa-Ama, kayo’y sumasaakin, at ako’y sumasainyo.
“Ang tumatanggap sa mga utos ko at tumutupad nito ang siyang umiibig sa akin. Ang umiibig sa akin ay iibigin ng aking Ama; iibigin ko rin siya, at ako’y lubusang magpapakilala sa kanya.”
Ang Mabuting Balita ng Panginoon.
📖 Kuwento ni Hesus
Nangako si Kuya Hesus sa Kanyang mga alagad na hihiling Siya sa Ama ng isa pang Patnubay, ang Espiritu Santo, na sasama sa kanila habambuhay. Sinabi Niya na ang tunay na nagmamahal sa Kanya ay ang mga sumusunod sa Kanyang mga utos. Hindi Niya tayo iiwang mag-isa o nangungulila dahil mananatili Siya sa ating puso sa pamamagitan ng Espiritu ng katotohanan upang bigyan tayo ng lakas at gabay.
“Kung iniibig ninyo ako, tutuparin ninyo ang aking mga utos. Dadalangin ako sa Ama, at kayo’y bibigyan niya ng isa pang Patnubay na magiging kasama ninyo magpakailanman.” Juan 14:15-16
🙇🏽♂️ Ating Karanasan
Hindi ba minsan kapag may pinapanood tayong nakakatakot ay tinatakpan natin ang ating mga mata o nagtatago tayo sa likod ng kumot? May mga pagkakataon din na natatakot tayong gumawa ng isang bagay dahil bago ito o mahirap. Minsan, alam naman natin ang tamang gawin pero natatakot tayong gawin ito dahil iba ang ginagawa ng karamihan. Kaya tumatawag tayo kay nanay, tatay, o sa isang taong pinagkakatiwalaan natin. Sa buhay, hindi lang multo ang kinakatakutan natin kundi ang paggawa ng tama. Mabuti na lang, may kasama tayong tutulong sa atin.
🔍 Balikan ang Sarili
Naranasan mo na bang sumunod sa isang utos upang magawa nang maayos ang isang bagay? Ano ang naging resulta nito?
🌟 Aral ni Hesus
Itinuturo sa atin ni Hesus na ang pag-ibig ay hindi lang sinasabi kundi isinasabuhay. Sa tulong ng Espiritu Santo, nagiging posible ang pagsunod sa tama.
🟡 Ipinapakita natin ang ating pag-ibig kay Hesus sa pagsunod sa Kanyang mga utos. Kapag pinipili mong maging tapat, mabait, at masunurin, ipinapakita mong mahal mo si Hesus. Tulad ng pagsunod sa guro o magulang, mas nagiging maayos ang lahat kapag sumusunod tayo.
🟡 Hindi tayo nag-iisa dahil kasama natin ang Espiritu Santo. Ipinadala Siya ng Ama bilang Patnubay na tutulong sa atin araw-araw. Kapag nahihirapan kang pumili ng tama, binibigyan ka Niya ng lakas ng loob at tamang isip.
🟡 Mas nagiging malinaw ang presensya ni Hesus kapag namumuhay tayo sa pag-ibig. Kapag sumusunod tayo sa utos na magmahal, mas nararamdaman natin na si Hesus ay buhay sa ating puso. Sa simpleng kabutihan, tulad ng pagtulong at pagpapatawad, ipinapakita natin ang Kanyang pagmamahal.
👦🏽👧🏽 Munting Gawain
✅ Manindigan para sa tama. Kung may nakikitang kaklaseng tinutukso (bullying), gamitin ang lakas ng loob mula sa Espiritu Santo para ipagtanggol sila o humingi ng tulong sa nakatatanda
✅ Humingi ng tawad o umamin sa isang pagkakamali
✅ Magdasal muna nang tahimik bago magsalita kung nakakaramdam ka ng galit sa isang kalaro.
🍎 Huwag kalimutang i-download at sagutan ang LiturgyFun worksheet para sa linggong ito!
🙏 Panalangin
♱ Panginoong Hesus, salamat po sa pangako Mong hindi Mo kami iiwang mag-isa sa aming paglalakbay. Ipagkaloob Mo po sa amin ang Iyong Espiritu Santo upang palaging gabayan ang aming puso na sumunod sa Iyong mga utos at magmahal nang tapat sa aming kapwa. Amen.
